BY: ADRA Timor – Leste
ADRA Timor-Leste, liuhusi Projetu Hakbiit Feto, asina ona akordu ho Organizasaun Sosiedade Sivíl ne’ebé foku ba Feto hamutuk haat atu implementa Programa Eskola Kampu no Klimátika ba Agrikultór sira iha munisípiu haat. Dili, 15 Agostu 2022.
Projetu Hakbiit Feto marka tan istória importante ida liuhusi asina akordu ba sub-grant ida ho Organizasaun Sosiedade Sivíl (OSS) ne’ebé foku ba feto sira hamutuk haat atu empodera feto sira iha Timor-Leste. Fundasaun Esperança, Fundasaun Kolegas Da Pas, Fundasaun Haburas Moris no Centro Nossa Senhora do Rosario mak OSS hirak ne’ebé hetan prémiu, no sira ne’e kompleta ona ho susesu Formasaun nu’udar Treinadór kona-ba Eskola Kampu no Klimátika no mós Agro-Negósiu ba Agrikultór sira.
Liuhusi akordu ida-ne’e, OSS hirak-ne’e sei hetan fundus sufisiente hodi estabelese, treina, monitoriza no halo akompañamentu ba grupu Eskola Kampu no Adaptasaun Klimátika ba Agrikultór hamutuk grupu sanulu-resinlima iha munisípiu Ainaro, Baucau, Bobonaro, no Dili iha tinan 2022. Grupu hirak-ne’e mós sei hetan apoiu materiál báziku ba sira-nia atividade agrikultura nian, no mós hetan akompañamentu no monitorizasaun regulár hodi garante sustentabilidade husi atividade ida-ne’ebé bele hetan rendimentu. Formasaun ne’e sei inklui mós sesaun relevante sira kona-ba asuntu jéneru, prevensaun violénsia doméstika no violénsia bazeia ba jéneru. Sei iha pelumenus sistema bee rua mak sei instala iha kada munisípiu.
Hakbiit Feto mosu ho objetivu atu hametin kapasidade grupu feto Timoroan sira nian iha área pratika agrikultura di’ak no ligasaun merkadu. Formasaun ba grupu agrikultór feto sira sei foku liu ba oinsá hasa’e kuantidade no kualidade produsaun lokál ne’ebé identifika tiha ona iha peskiza merkadu no mapamentu kadeia de valor nian, hanesan foos mean no metan, fore-rai, batar, fehuk, liis mutin & mean no produtu ortikultura sira seluk, liuhusi aproximasaun adaptasaun klimátika no konservasaun rai.
“Mudansa la’o daudaun ona ba feto-maluk Timoroan sira. Uniaun Europeia sente haksolok tanba iha OSS haat ne’ebé mai hamutuk ho Projetu Hakbiit Feto hodi luta ba igualdade jéneru iha Timor-Leste. Ida-ne’e mak buat ne’ebé ita hanaran empoderamentu feto. Sei laiha buat ida kona-ba sira, se sira laiha”, hateten Karla da Silva Leitzke, Ofisiál Programa Uniaun Europeia nian ne’ebé responsabiliza ba asuntu Sosiedade Sivil no Jéneru.
Projetu ida-ne’e fó dalan ba feto sira, liuliu feto vulneravel sira iha área rurál no Urbanu sira iha Timor-Leste, atu tama iha grupu relevante sira, atu bele foti sira-nia vida agora no futuru nian iha sira-nia liman, hetan espasu ne’ebé seguru atu espresa sira-nia hanoin no planu sira ne’ebé bele hasa’e sira-nia fiar aan, haforsa sira-nia abilidade sosiál no estabelese relasaun sosiál iha nivel komunidade atu nune’e sira hotu bele hamutuk sai forte liután.
Projetu Hakbiit Feto sei hala’o serbisu durante tinan 4 nia hodi empodera feto Timoroan sira sosiál no ekonomikamente. Oinsá? Liuhusi haforsa OSS sira atu halo operasaun ho efikás atu apoia dezenvolvimentu no empoderamentu ba feto sira, promove relasaun iha família ne’ebé apoia feto sira-nia partisipasaun iha atividade sosiedade no ekonómiku nian, no mós apoia feto sira-nia envolvimentu iha sosiedade no ekonomia liuhusi partisipasaun iha sistema kadeia de valor no sistema merkadu. ADRA Timor-Leste ne’ebé serbisu iha parseria ho Rede Feto Timor-Leste implementa projetu ida-ne’e, orgullu tanba hetan apoiu fundus husi Uniaun Europeia, no finansia hamutuk ho Ajénsia Dezenvolvimentu Austria nian.
Discussion about this post