PROGRAMA MONITORIZASAUN BA SISTEMA JUDISIÁRIU

By: Media JSMP

Komunikadu Imprensa

Tribunál Distritál Suai

09 Juñu 2021.Defensória Públiku Suai la marka prezensa iha julgamentu móvel iha Munisípiu Maliana tanba laiha transporte

JSMP rekomenda ba Defensória Públiku Jerál no Ministériu Justisa atu responde urjente

Tribunál Distritál Suai realiza julgamentu móvel iha segundu semana fulan Juñu 2021 iha Maliana, Munisípiu Bobonaro ba kazu hamutuk 34. Maibé julgamentu móvel ne’e, la hetan partisipasaun ka prezensa husi Defensória Públiku Suai tanba laiha transposte.

“JSMP observa katak situasaun ne’e grave teb-tebes tanba iha ajenda julgamentu loron dahuluk ka iha Segunda-feira nian iha kazu koletivu lima (5) ne’ebé tribunál tenke halo adiamentu tanba laiha defensór atu fó asisténsia ba arguidu sira ho razaun klásiku, laiha trasporte. Ho situasaun ne’e JSMP husu ba Defensoria Públiku Jerál no Ministériu Justisa atu responde situasaun ida ne’e emidiata hodi asegura direitu sidadaun sira (kbiit laek) atu asesu ba justisa,” dehan Diretora Ezekutiva JSMP, Sra. Ana Paula Marçal. 

Iha 08 Juñu 2021, Tribunál Movel marka ona ajenda ba kazu krime kontrabandu ida no krime abuzu seksuál ba menór ida. Maibé kazu sira ne’e tribunál tenke nomeia fali advogadu privadu hodi substitui defensór públiku hodi fó asisténsia ba arguidu sira tanba nia defensór la marka prezensa. Advogadu privadu sira foin hetan subsituisaun iha momentu ne’ebá no seidauk hatene ho di’ak kazu sira ne’e nune’e bele mós fó implikasaun fó defeza ne’ebé di’ak.

JSMP konsidera situasaun ne’e grave no prejudika tebes parte sira nia direitu atu asesu ba justisa ne’ebé justu tanba parte sira hein hela defensória sira nia asisténsia ho kualidade gratuita ba sira nia kazu maibé defensór sira la ba fó asisténsia tanba problema transporte. Ho razaun ne’e, JSMP ejize ba Ministériu Justisa atu fasilita urjente transporte operasionál ne’ebé sufisiente ba Defensória Públiku atu fasilita Defensór sira nia serbisu inklui ba partisipa iha tribunál móvel. Bainhira la fasilita transporte iha tempu badak maka bele implika tan ba iha direitu arguidu sira nian asesu ba justisa ho gratuitu iha julgamentu movel sira tuir mai.

Antes ne’e, iha Defensória Públiku Suai iha kareta operasionál rua mak fasilita Defensór sira ba hala’o sira nia serbisu maibé kareta ida sei iha ofisina no ida seluk avaria tanba hetan asidente.

Iha JSMP nia relatóriu Observasaun Setór Justisa no komunikadu imprensa sira antes-antes ne’e[1] rekomenda dala barak ona ba iha Ministériu Justisa atu tenke fó fasilidade ne’ebé sufisiente ba Defensoria Públika hodi halo sira-nia serbisu ho di’ak, maibé ate ohin loron defensór sira kontinua enfrenta problema kona-ba transporte no fasilidade sira seluk, no ikus mai Defensoria Públika Suai labele marka prezensa iha julgamentu móvel iha Munisípiu Maliana.

Iha 2020, iha debates Orsamentu Jerál Estadu 2021, Ministru Justisa rekoñese Defensoria Públiku sira menus transporte atu fasilita sira nia serbisu iha tribunál sira. Nune’e, Ministru Justisa promete sei transfere veikulu hamutuk 8 (ualu) husi Kompañia Sistema Nasionál Kadastru ne’ebé remata ona kontratu ho Governu ba iha Instituisaun Defensoria Públiku maibé to’o agora foin transfere veikulu rua maibé ho kondisaun aat nune’e situasaun Defensoria Públiku kontinua falta transporte.

Ba informasaun liu tan, bele asesu file PDF iha kraik ne’e;