Fundasaun Pátria Realiza Treinamentu ba Radio Lokál

Reporter: Paulo Collo

Fundasaun Pátria hamutuk ho parseiru dezenvolvimentu PLAN Internasional realiza treinamentu ba faze daruak ho tema“Hakbi’it Rádiu Lokál Ne’ebé Kualidade Iha Parte Jestaun Rekursu no Oinsá Halo Advokásia ba Jornalista Rádiu Sira.” Ne’ebé kompostu husi Radio Komunidade no Radio Privadu Non – Lukrutivu hamutuk rua nulu resin tolu (23) husi Munisipiu no nasionál, faze treinamentu ne’e fahe ba rejiaun haat (4). Treinamentu refere ba jornalista no jestór média sira hamutuk tolu nulu resin hitu (37)  Iha Tower Fatuhada, Dili, Timor – Leste durante loron rua.  Kinta – Feira (30/11/2023).

Tuir Jerente Projeitu  Fundasaun Pátria, Idalia Boavida katak, “objetivu husi treinamentu ida ne’e, atu hakbiit Radio Lokal ho kualidade, iha jestaun rekursu nian no oinsá atu halo Advokásia ba Jornalista sira iha rádiu lokál, tanba  ita haree katak, instituisaun hirak-ne’e non -lukrutivu, entaun ho razaun ida ne’e mak, ita hakarak enkoraja jestór no jornalista iha kada rádiu sira, liu husi atividade ne’ebé mak halo ne’e, nune’e bele hasa’e kapasidade hodi sira bele, kria rasik sira nia programa komersiál atu bele mudansa ba iha rádiu ninian.

 Ita ko’alia kona ba rekursu ita iha buat tolu ne’ebé mak importante tebes, entaun presiza jestor sira atu jere ninia rekursu humanu, finanseiru no ekipamentu material sira. Nune’e mós, sira bele iha kapasidade buka fundus entre ho parseiru governu nomós ONG lokal no ajénsia Internasional sira.”

Jornalista Radio Rakambia halo konfirmasaun ba Fundasaun Patria kona-ba saida mak output depois dé treinamentu refere.

Idalia haktuir” Fundasaun Pátria nia hanoin katak, ba iha futuru ida ne’e hanesan projetu no buka fundus tanba treinamentu ida ne’e ikus. Ami labele dehan sei kontinua ou lae.  Fundasaun Pátria hakarak fó output ba média lokál sira tenke sai independente loos ba sira ninia kobertura ligadu ho asuntu ne’ebé maka relevante.

Jestor Fundasaun PATRIA, Idalia Boavida

 Iha fatin hanesan focal point Plan Internasional, Delsio Guimaraes aumenta. “Plan ninia serbisu atu proteje labarik sira, liuliu labarik feto sira” tan ne’e ami halo parseiru ho Pátria atu fahe informasaun sira kona ba prevensaun asédiu sexual, tan ne’e maka ami fahe treinamentu sira ne’e relasiona ho matéria ne’ebé mak iha.”

Focal point Plan Internasional, Delsio Guimaraes

Iha sorin seluk partisipantes ba iha workshop neé, Jerente Rádiu LABEH, Sidonia Fernandes reforsa liu tan. “Durante loron rua nia laran ha’u aprende kona-ba oinsa hanesan jestor ida atu jere ita nia instituisaun ka rádiu ninian liu husi ninia programa sira inklui jestaun ba iha administrasaun nian ne’e oinsá, ida seluk maka oinsá atu forma didi’ak ita nia jornalista sira bele sai jornalista investigativu liuliu  ba kazu sira hanesan abuzu no asédiu sexual ba labarik sira nomós ba ema ho defisiénsia no la ho defisiénsia.”  

Jerente Rádiu LABEH, Sidonia Fernandes

Donia informa tan. “Hanoin katak liu husi treinamentu ida ne’e bele loke ona hanoin atu bele implementa filafali saida maka hetan nune’e bele garante kualidade proteje labarik liu husi Advokásia sira.”