Reportazen : Juvita Menezes de Deus
Photo By: Sergio De J. B. Lelan
Aliansa Maubere nasionál (AMN) realiza komunikadu Imprensa kestiona polítika parlamentu nasionál sosa karreta foun no laptop ba deputadu no deputada sira , desizaun ida ne’e la fo benefísiu ba povu Timor-Leste nia interese. Atividades asaun protestu nee realiza iha kampus UNTL, Dili, Timor-Leste. Iha Sesta-Feira (21-10-2022)
Parlamentu Nasionál sei sosa karreta tolu nulu (30 ) marka pajero sport ba deputadu no deputada sira, kada unidade nia folin rihun neen nulu resin lima dollar Amerikanu ( $.65.000) , totál Orsamentu ba Karreta tolu nulu (30) hamutuk iha Miliaun ida rihun atus sia lima nulu dolar Amerikanu ( $1.950.000 ) , no mós sei sosa laptop marka Appel iha neen nulu resin lima (65), ho folin kada laptop ida rihun rua atus lima ($2.500), totál orsamentu sosa laptop ba Deputadu no Deputada sira hamutuk iha rihun atus ida neen nulu resin rua pontu atus lima dolar Amerikanu ( $162.500).
Relasiona ho desizaun polítika ida ne’e Aliansa Maubere nasionál (AMN) halo kontra hasoru polítika parlamentu nasionál sosa karreta no laptop ba deputadu/deputada sira , Aliansa Maubere nasionál (AMN) husu estadu tenke halo distribuisaun justu ba riku soin Timor nian atu nune’e povu bele sente moris ho dignidade no saudavel tuir lei artigu 6 ne’ebé konsagra iha konstituisaun RDTL.
Tuir Portavós Aliansa Maubere Nasional (AMN), Gaspar Maugamu Hateten “Lala’ok dezenvolvimentu ohin loron ne’ebé ho karakter husi leten ba kraik implika distribuisaun justu ba rekursu Timor nian, maski konstituisaun RDTL rasik konsagra iha nia Art. seis (6) katak, estadu tenke halo distribuisaun justu ba riku soin Timor nian, atu nune’e povu hotu-hotu bele sente moris ho dignidade no saudavel, ida ne’e tuir ami nia hare la akontese iha modelu foti desizaun ne’ebé in poin husi leten ba kraik hodi ema hotu subordina, laiha demokrasia partisiva, maibé iha mak demokrasia ba elite minoria, ka ditadura dos elites.
Tinan rua nulu (20) ona Timor-Leste independente, maibé povu maioria mak sei moris iha liña pobreza ne’ebé esternu , malnutrisaun, dezempregu, sistema saúde ne’ebé la adekuada no setór edukasaun ne’ebé laiha kualidade, ida ne’e rezultadu husi dezenvolvimentu ekonomia polítika ne’ebé la’o hela iha Timor-Leste, iha ne’ebé despeza publika la fó benefísiu ba povu Maubere nia interese, maibé ba hakonu de’it klase elite balun nia an no nia interese ” Nia Dehan
Desizaun polítika Parlamentu Nasional planu sosa karreta ho laptop iha orsamentu privativu tinan rihun rua rua nulu resin tolu (2023) ne’e la reflete interese povu nian.
” Daudaun ne’e iha dia 3 dé outubru tinan 2022 , parlamentu nasionál foti desizaun polítika ida hodi integra planu sosa karreta pajero no laptop iha sira nia orsamentu privatize tinan rihun rua rua nulu resin tolu (2023), desizaun ida ne’e tuir ami nia hare, la reflete interese povu hotu-hotu nian, la’os foin mak akontese, maibé polítika sosa no sa’e karreta luxu sai toman ida iha ukun ohin loron nian.
Desizaun ida ne’e hatudu situasaun ida ne’ebé ita hotu tenke nota, iha sorin ida, eziste elite ne’ebé kaer podér hodi hakonu sira nia interese, no sorin seluk, eziste povu traballadór, ambulante, agrikultór, kiak sidade, ne’ebé moris terus, susar, sovre iha sosiedade Timor-Leste, ne’e hatudu katak elite povu Maubere nia interese “
Elite hanehan povu Maubere, dezde uluk to’o agora liu husi estadu, elite sira akumula sorin, enkuantu povu Maubere asesu no foti de’it nia restu.
” Ami nu’udar Aliansa Maubere Nasional (AMN), ne’ebé kompostu husi organizasaun sosiál no setór masa sira seluk hanesan ambulante, kiak sidade, agrikultór, traballadór, ami nu’udar povu Maubere afirma no ezije kona – ba :
Primeiru, Ami povu agrikultór, ambulante, kamponezes, kiak sidade, traballadór, estudante no joven reprezentante lian -laek sira seluk, rejeita totál desizaun parlamentu nasionál kona-ba sosa karreta pajero no laptop ba deputadu no deputada sira.
Segundu, Ami ezije parlamentu nasionál, Liu-husi diskusaun plenária ba orsamentu jerál estadu (OJE), atu elimina planu sosa karreta foun no laptop.
Terseiru, Ami husu ba Prezidente Repúblika atu tetu didi’ak OJE molok promulga, ami hanoin katak di’ak liu veta kuandu parlamentu nasionál la altera doasaun orsamentál kona-ba ba sosa karreta foun no laptop.
Kuatru, ami husu atu despeza estadu nian tenke aloka barak ba setór estratéjiku sira ne’ebé fó benefísiu ba interese povu Maubere nian.
Kintu, ami husu ba sosiedade, estudante sira no povu Maubere hotu atu konsiente katak, ita moris iha dominasaun Foun ( neu-kolonializmu no neu-liberalizmu), ida ne’ebé elite sira supa no hariku-an liu husi dalan legál.
Sestu, ami husu ba Movimentu hotu-hotu, setór sira hotu ne’ebé luta ba justisa, atu hamriik hodi hamosu asaun masa ida hasoru ukun ditadura osan, ka ditadura elite nian.
Ikus Liu, ami hakarak dehan katak durante ne’e despeza publika só hakonu de’it elite sira nia kaan no interese, hanesan polítika regulár sosa karreta, direitu regula no priviléjiu sira, ba sosiedade tomak, ita presiza hanoin, tetu, krítiku no nesesáriu hamosu asaun masa hodi kontra injustisa iha ita nia rai ida ne’e, nune’e Aliansa Maubere Nasional (AMN) sei eziste no reziste, ohin, aban no ba futuru ” portavós Maugamu hakotu.
Discussion about this post