Embaixadór foun husi Uniaun Europeia iha Timor-Leste  simu akreditasaun husi Prezidente Repúblika

By Uniaun Europea

Dili, 16 Setembru 2022: Ohin, Embaixadór foun husi Uniaun Europeia (UE) iha Timor-Leste, S.E. Sr. Marc Fiedrich, aprezenta tiha ona ninia karta kredensiál sira ba Prezidente Repúblika, S.E. Dr. José Ramos-Horta, iha Palásiu Prezidénsial, iha Dili.

Prezidente Ramos-Horta kongratula Embaixadór Fiedrich ba nomeasaun, no fó benvindu ba nia ho laran luak.

Prezidente no Embaixadór ko’alia kona-ba área-xave sira husi koperasaun, hanesan integrasaun rejionál, diversifikasaun ekonómika no nutrisaun. Sira mos aborda panorama polítiku iha TimorLeste no tinan eleitorál, ne’ebé besik atu mai.

Embaixadór Fiedrich hato’o ninia kompromisu hodi dezenvolve saida mak ninia antesesór alkansa tiha ona, no hodi haklean no habelar liu tan relasaun sira iha entre Uniaun Europeia no TimorLeste, ne’ebé di’ak tebes. Timor-Leste no UE fahe valór sira hanesan, no sira unidu iha defeza no promosaun husi liberdade fundamentál sira, direitus umanus, demokrasia no husi multilateralismu. Nia promete katak Uniaun Europeia sei sempre sai parseiru ida tau laran ba Timor-Leste, ne’ebé fó apoiu ba nia esforsu sira iha konstrusaun nasaun nian.

Serimónia ne’e konta ho prezensa husi Vise-Ministru Negósius Estranjeirus no Koperasaun, S.E. Sr. Julião da Silva, no husi pesoál husi Delegasaun UE iha Timor-Leste.

Kona-ba  Embaixadór Marc Fiedrich

Embaixadór Marc Fiedrich funsionáriu públiku europeu ida dezde 2003. Nia serve tiha ona iha Delegasaun sira UE nian iha Nijéria no Venezuela, molok atu integra iha Servisu husi Intrumentu sira husi Polítika Esterna Komisaun Europeia nian iha Bruxelas. Embaixadór Fiedrich moris iha Alemaña, kaben no la iha oan. Nia simu nomeasaun nu’udar Embaixadór UE iha Timor-Leste iha fulan Juñu tinan 2022, ne’ebé substitui Andrew Jacobs. Nia to’o iha Timor-Leste iha loron 5 fulan Setembru. Ninia misaun iha durasaun ba tinan tolu.