DDF 2022: SEKOMS- SEII  Lansa Relatóriu Servisu Konsellu Imprensa

Reportajen:Laurinda Correia Guterres

Sekretáriu Estadu Komunikasaun Sosiál (SEKOMS), Mericio Juvinal “Akara” ho sekretária Estadu Igualdade no Inkluzaun (SEII), Maria do Rosario Fatima Correia, Prezidente Konsellu Imprensa nomós menbru sira hotu,  ofisialmente lansa ona relatóriu servisu konsellu Imprensa iha tinan 2021 nian. Atividade refere  realiza iha Dili, Salaun CNE, Lalini Larigutu. (26/8/2022).

Dili Dialogue Forum (DDF) ne’e hetan suporta  hosi UNESCO no partisipa mós hosi reprezentante Konsellu Imprensa sira hosi Filipina, Tailandia, Indonesia, no Myanmar inklui estudante Universitáriu sira husi UNTL, UNDIL no UNITAL.

 Iha oportunidade dahuluk, Diretór Ezekutivu Konsellu Imprensa (KI) Rigoberto Monteiro hateten, tinan tinan Konsellu Imprensa sempre halo lansamentu relatóriu servisu Konsellu Imprensa nian.

“Ha’u hakarak ko’alia kona-ba relatóriu tinan 2021  nian, iha relatóriu ne’ebé halo lansamentu ne’e iha komponente tolu (3) mak iha laran, nia hateten iha introdusaun antes halo lansamentu ba relatóriu refere.

Komponente ida kona-ba dezenvolvimentu instituisaun órgaun sira-nia servisu hala’o saida  loloos nune’e mós kada semana sira-nia enkontru deside kona-ba saida no regula saida no Delibera saida-saida, nune’e mós iha komponente segundu ne’e kona-ba progresu servisu programatiku nian.

Iha dezenvolvimentu media ne’e la’o oinsá no karteira profisionál hira mak entrega ona,  media hira mak ita registu ona no media hira mak ita notifika ona, jornalista hira mak komete infrasaun étika nian.

Enkuantu iha komponente terseiru ko’alia kona-ba relatóriu ba gastus orsamentu ba iha konsellu imprensa nian ne’ebé tinan tinan orsamentu mai hosi Estadu nian.

Tamba ne’e atu promove boa governasaun KI sempre lansa nia relatóriu laos liuhosi de’it livru maibé kada tinan aprezenta relatóriu ba tribunal das contas nomós atu halo auditóriu ba gastus sira ne’ebé Konsellu Imprensa halo. ” Nia dehan

Alende nemós nia hateten durante ne’e diretor ezekutivu KI sira mós seidauk hetan notifikasaun hosi komisaun Anti Korrupsaun (KAK) no mós seidauk hetan notifikasaun hosi tribunál kontas entaun sira-nia gastu di’ak hela seidauk viola lei korrupsaun nian.

“Iha futuru oin mai ita la viola, tamba ita tenke promove boa governsaun no kombate korrupsaun iha ita-nia nasaun, ha’u hanoin komponente mak ida ne’e hosi relatóriu tinan ida ne’e nian ami lansa no espera servisu ne’ebé ita hamutuk halo iha futuru kontinua reforsa.”Nia hakotu