Comunity Learning Center No Fundasaun Habelar Neon Badaen Muda Cultura TL

Reportajem: Jacinto Amaral Soares

Fundador Community Learning Center Leonizia Guterres Belo. Photo by: Melcior Ximenes Ferreira

Timoroan harii sentru aprendizajen, iha mehi hakarak kapasita no forma karakterístika foin-sa’e sira nian. No mos investe joventude sira neebe mak dezempregu.

Sentru lee ho naran, Community learning center eziste iha 2019 ho intensaun atu kapasita no muda karakterístika  foin-sa’e sira nian, liuhosi hatoman an le livru. Sentru refere agora dadaun sei iha  prosesu konstrusaun nia laran,  lokaliza iha Santa Cruz, Dili.

Fundadóra Leonizia Guterres Belo, wainhira hetan entrevista ho jornalista Radio Rakambia, Tersa – Feira (18/07/2022) ne’e, informa katak nia ho inisiativa harii komunidade kona-ba lee livru ne’e, tanba iha nia observasaun jerál ba Timoroan sira laiha abitua le’e livru liuliu labarik sira.

“Hau hakarak loke Community learning center tanba tuir observasaun ne’ebé iha durante hela iha Timor, ha’u haree labarik barak ne’ebé mak laiha abitua hodi le livru, depois la’ós de’it ida ne’e, ha’u mós observa katak ita-nia labarik sira ne’e nia critical thinking ne’e menus liu, sira bainhira atu rezolve problema sira ladún hanoin krítiku, sira la hatene halo desizaun ida ne’ebé mak di’ak, entaun ha’u hare ida ne’e hanesan problema ida, no ha’u hakarak sai hanesan parte no solusaun ba problema ida ne’e, entaun ha’u buka dalan mak ko’alia ho família sira no hamosu ideia ida ne’e, no agora dadun ami nia fatin, sei iha prosesu konstrusaun nia laran. Ha’u koko atu kolabora ho parte sira seluk, organizasaun sira seluk atu nune’e ha’u bele  hetan apoiu, ideia ida ne’e la’ós atu loke biblioteka de’it, maibé primeiru atu oinsá mak ita hanorin labarik sira lai, oinsá atu hanoin ne’ebé loos introdús sira ba livru sira, atu nune’e sira hatoman an iha ambiente ida livru ninian ne’e, hodi nune’e sira bele iha interese atu le’e,” esplika Leonizia.

Nia hatutan tan katak, ho mehi ne’ebé iha, nia iha esperansa boot atu transforma mentalidade no kapasita foin-sa’e timoroan sira bele forma karakterístika liuhosi abitua le barak.

“Hau hakarak tebe tebes transformasaun boot ida ne’ebé mak akontese iha Timor, iha área le ninian no ha’u fiar katak transformasaun boot ida ne’e sei bele akontese bainhira ita hahú uluk hosi komunidade ki’ikoan ne’ebé mak ita bele kontrola, ne’ebé ha’u hakarak ita-nia estudante sira ne’e, liuliu ba inan aman atu koko kontrola sira  nia oan, introdús livru hosi ki’ikoan kedas, primeiru  hosi livru ne’ebé mak simple, atu inan aman iha abitua ida ne’ebé mak le livru ba sira nia oan, ezemplu molok atu toba le ba sira nia oan, atu nune’e forma sira nia abitua ida ne’e dezde ki’ik, ba joven sira ne’e ha’u sente sira presiza le livru barak tanba bainhira ita ba eskola ne’e ita presiza informasaun sira ne’ebé faktus entaun buat sira ne’e ita bele hetan liuhosi livru, tanba liuhosi livru bele halo luan liután ita-nia koñesimentu no ajuda ita atu asesu ba informasaun sira ne’ebé mak dala ruma ita la hatene, halo ita koñese di’ak liu tan ita-nia envairomentu, forma ita-nia karakter, liuliu ajuda ita atu halo desizaun iha ita-nia moris loroloron,” katak Leonizia.

Prezidente fundasaun Habelar Neon Badaen Isac Pinto de Jesus. Photo by: Melcior Ximenes Ferreira

Iha sorin seluk prezidente fundasaun Habelar Neon Badaen Isac Pinto de Jesus, hateten katak ho fundasaun ne’ebé nia harii atu kapasita joven sira tuir nesesidade ne’ebé iha nune’e bele kompete iha kampu traballu no bele ba serbisu mós iha estranjeiru.

Entretantu sentru refere harii iha tinan 2016, to’o agora prodús ona foin-sa’e intelektuál barak no barak mós ba servisu ona iha estranjeiru.

“Fundasaun Habelar Neon Badaen iha pre eskolár ba eskola formál ho non formal, hanesan kursus oin oin ne’ebé ami kria iha ne’ebá Portugés Inglés, Japaun, Korea, ami fasilita ba joven sira ne’ebé mak iha interese atu aprende, tanba nasaun ne’e presiza joven sira  ne’ebé mak traballadór ba servisu iha fatin seluk presiza língua mós, fasilita ba joven sira tanba nasaun presiza duni ba korea garantidu katak nia bele ba korea, ingles nia garantidu katak nia bele ba Australia no fatin sira seluk ne’ebé ami arranja tuir kondisaun Timor nian, ami prepara mós lian Jerman karik ba futuru nasaun Timor-Teste parseiru ho ema sira seluk para haruka traballadór sira ami fasilita ona, ami preparadu ona karik iha futuru teste ruma sira tuir formasaun sira bele konkorre ho vaga hirak ne’ebé estadu prepara,” hateten Isac.