Reportajen: Jacinto Amaral Soares
Vice- Prezidente MCC, Cameron Alford no Ministru Prezidénsia Konsellu Ministru, Fidelis Manuel Leite Magalhães. (19/07/2022).
Governu Timor-Leste ho Ajénsia Governamentál Amerikanu Millenium Challange Corporation (MCC), asina akordu kooperasaun ho montante totál dolares Amerikanu millaun hat, ualu nolu resin hat (484), hodi hadi’a área importante liu ba dezenvolvimentu Timor-Leste nian, hanesan edukasaun, saneamentu no abastesimentu bee. Kompaktu akordu ne’e, asina hosi Ministru Prezidénsia Konsellu Ministru, Fidelis Manuel Leite Magalhaes ho Vice- Prezidente MCC, Cameron Alford, iha salaun Ministériu Negosiu Estranjeiru, Praia Kokeirus, Tersa – Feira.(19/07/2022).
Hosi totál ne’ebé kalkula ona hamutuk dolares, amerikanu millaun, Hat, ualu nolu resin hat (484) nee mai husi MCC no Governu Timor – Leste nee rasik. dolar amerikanu millaun Hat, rua nolu (420) sei oferese husi MCC, no milaun Nen Nolu Resin Hat (64) sei mai husi Governu Timor-Leste, osan refere sei aloka de’it ba projetu tratamentu bee, ezgotu no drenajen nian, hosi osan sira ne’e dolar amerikanu millaun 34 sei uza hodi halo ligasaun ba uma sira no hodi dezativa forsa ne’ebé iha. Restu dolar amerikanu 30 sei utiliza hodi apoia, instalasaun sistema konvensionál no ba instalasaun bomba bee nian.
Iha eventu importante ne’e, marka prezensa hosi Primeiru Ministru (PM), Taur Matan Ruak, Membru Governu, Deputadu, Autoridade Munisipál, Lider Komunitária, reprezentante hosi organizasaun publika sira, Sosiedade Sivil, Setor Privadu, Korpu Diplomatiku, no Parseiru sira dezenvolvimentu nian.
Iha serimonia importante ida nee, Primeiru Ministru, Taur Matan Ruak iha nia diskursu hateten, “Parte hotu-hotu tenke koopera hodi aselera programa ne’ebé Governu Timor-Leste ho MCC asina ona hanesan dezenvolve edukasaun, saneamentu no abastesimentu bee, la’os de’it ba Ministériu ne’ebé tutela.
Aposta ida ne’ebé multisetorial no transversal, kona-ba impaktu pozitivu sira iha nivel hotu-hotu iha ita-nia sosiedade, no konsege mobiliza esforsu iha Governu tomak, ho enkorajamentu ba espíritu pertensa la’ós de’it ministériu sira ho tutela direita iha edukasaun, juventude desportu no obras publika, maibé mós, iha órgaun soberania, sira seluk, hanesan Parlamentu Nasionál, no Prezidénsia Repúblika, ho kontribuisaun importante hosi organizasaun sira sosiedade sivíl nian,”PM informa.
PM hatutan tan. “ liu hosi asina akordu ida ne’e ba oin, Governu no mós parte kompetente sira hotu, sei serbisu makas liu tan hodi ezekuta programa ne’ebé define ona ho efikásia, responsabilidade no tranparensia.
Oras ne’e hahú traballu makas ba ninia implementasaun, hodi labele defrauda espetativa sira hosi povu timor oan, husu ba sira nia ezekusaun di’ak, ho efikásia, responsabilidade no transparansia,”
Iha fatin hanesan, intervensaun hosi Ministru Prezidénsia Konsellu Ministru, Fidelis Manuel Leite Magalhães katak, felisita no louva ba Governu Timor-Leste ho MCC tanba liuhusi asina akordu kompaktu ida ne’e, bele fó benefísiu ba povu Timor-Leste.
“Serbisu, esforsu no dedikasaun individuál no koletiva hosi ekipa sira husi Timor-Leste no MCC, katak sira nia serbisu makas sei benefísiu povu Timor-Leste iha prezente no iha Futuru,” Dehan Fidelis.
Fidelis salienta liu tan, “Ho kooperasaun Timor-Leste ho Estadus Unidus Amérika liuhosi MCC ida ne’e hanesan oportunidade di’ak hodi dezenvolve área importante sira ne’ebé mak prioritiza ona iha asina akordu kompaktu refere.
Ne’e oportunidade di’ak hodi hadi’a kondisaun fízika sosiál ambientál, no ekonómika hosi ita-nia populasaun, hodi hetan no forma efikáz no efisiente, komunidade rejilente liu,”
Entretantu tuir Vice- Prezidente MCC, Cameron Alford, hato’o nia diskursu iha serimonia ne’e hateten, nia kontente ho serimónia asina akordu ida ne’e, tanba bele hametin liu tan kooperasaun entre Timor-Leste ho Estadus Unidus Amérika, no tuir nia katak ho eventu refere marka istória foun ba relasaun bilaterál entre nasaun rua ne’e.
“Ohin ha’u haksolok mai iha ne’e, hodi marka momentu importante ida, iha relasaun importante entre Estadus Unidus Amérika ho Timor-Leste liu hosi asinatura programa kompaktu Timor-Leste nian ho valór dolar amerikanu millaun 420, investimentu ida ne’e reprezenta kontribuisaun dezenvolvimentu ne’ebé boot liu hotu iha istória ita-nia relasaun bilaterál durante tinan 20 no ida ne’e nu’udar sinál ida hosi ami nia komprimisu kontinua atu apoia Timor-Leste, ho parseria ida ne’e EUA liuhosi MCC no Timor-Leste aproveita oportunidade furak ida ne’e, hodi hamosu impaktu pozitivu ba povu Timor-Leste nia moris,” Cameron esklarese.
Nune’e, liuhosi informasaun nota pur eskrita balu hosi Predénsia Konsellu Ministru, Gabinete Ministru nian, ne’ebé Rede Media Timor-Leste (RMTL) asesu, hateten katak, Programa ne’e sei hare ba komponente prinsipál rua, ida atu hadi’a sistema bee, saneamentu, no drenajen no ida seluk iha área edukasaun no formasaun nian. Ida uluk inklui tratamentu ba bee, ezgotu, sistema drenajen, reforsu ba instituisaun no entidade reguladór sira, no kriasaun abastesimentu sólidu, ida ba bee no ezgotu, ba uzu doméstiku. Ida tuir mai sei inklui sentru exelénsia foun ida, ba formasaun profesór foun sira ne’ebé sei garante padraun, kualidade no lideransa nian.
Discussion about this post