Reportajen: Jacinto Amral Soares
Vice Ministru Agrikultura no Peskas MAP Abilio Xavier Araújo, husu estudante finalista Fakuldade Agrikultura na’in 57 ne’ebé sei termina sira nia estudu iha tinan ne’e, atu prátika saida mak sira aprende durante ne’e iha teoria hodi kria rasik kampu traballu. Liafuan hirak ne’e Vice MAP hato’o liu hosi entrevista ho jornalista Rádiu Rakambia iha serimónia Judisium ba dala XXVI ne’ebé realiza ohin iha salaun Delta Nova, Dili, (26/05/2022).
Abilio informa katak kestaun voluntáriu iha MAP sei barak tanba ne’e iha tinan ne’e seidauk halo rekrutamentu, membru Governu ne’e husu ba estudante finalista sira atu kria rasik kampu traballu, liuhosi teoria ne’ebé durante ne’e sira aprende ona, kria grupu kreativu ruma atu nune’e bele hadi’a ekonomia iha baze.
“Iha tinan ida ne’e ita seidauk rekrutamentu tanba iha Ministériu sei iha hela voluntáriu mós barak to agora, maibé ita motiva para oinsá ita-nia finalista sira hamosu grupu kreativu sira para depois atu halo servisu tuir saida mak sira aprende durante iha universidade para bele akompaña aproveita inan aman sira hodi hadi’a ekonomia iha baze,” katak Ahilio
Vice Ministru Agrikultura no Peskas ne’e hatutan tan katak, MAP ho UNTL planeia hela atu iha futuru estudante Fakuldade Agrikultura sira envolve liu iha prátika, duke teoria mak barak.
“Kuandu wanihira ita ko’alia kona ba Ministériu Agrikultura nia papél no mós ninia serbisu ne’ebé mak agora fó apoiu ba ita ninia komunidade sira, ita hare iha aspetu barak, iha aspetu ida ne’ebé mak ita atu fó apoiu ba iha grupu agrikultores sira, no buat balu ne’ebé mak ohin ita foin hamosu hanoin balu ko’alia ho magnifiku reitór UNTL ho Dekanu Fakuldade Agrikultura nian iha UNTL ita atu hare situasaun balu ne’ebé mak atu envolve ita-nia estudante sira ne’ebé mak iha Fakuldade Agrikultura la’ós de’it iha teoria maibé, atu hare situasaun balu tau iha prátika estudante sira nian,”hateten Abilio.
Iha fatin hanesan Judisiáriu Ruben dos Santos akresenta, hanesan finalista ida nia sente kontente tanba bele finaliza duni nia estudu, ba oin nia planu sei prátika saida mak durante nia aprende iha universidade hodi kria rasik kampu traballu ba aan rasik no fó serbisu ba ema seluk duke depende de’it ba estadu.
“Ha’u-nia planu ba oin maski seidauk hetan maibé ha’u-nia mehi ba oin hakarak susesu iha futuru, liu hosi saida mak ha’u aprende durante ne’e sei aplika iha baze liuliu bele dezenvolve setór agrikultura, peskas no pekuária hodi hadi’a ekonomia família inklui ekonomia rai laran,” dehan Ruben.
Discussion about this post