Reportajen; Jacinto Amaral Soares
Prezidente Repúblika José Manuel Ramos Horta informa katak, ema ne’ebé servisu iha prezidénsia nia laran labele mane de’it maibé tenke eziste iha jéneru, mane porsentu lima Nolu (50%) no feto porsentu lima nolu (50%). Lia hirak ne’e PR Horta hato’o liu hosi nia diskursu iha serimónia Restaurasaun Independénsia 20 Maiu ba dala XX ne’ebé realiza iha Palásiu Prezidente Ai-tarak laran, Dili. (20/05/2022).
PR Horta akresenta, sei servisu makas atu promove jéneru, nune’e iha prezidénsia ne’e, departamentu ida sei fó oportunidade mós ba inan feton sira, komunidade LGBTI no ema ho defisiénsia sira atu bele halo serbisu ho kualidade.
“Prezidensia ne’e sei izisti iha gender no iha prezidénsia iha departamentu ida tenke iha 50% mane 50% feto, dala barak ha’u reuniaun ho partidu polítiku sira movimentu sira ema mane mak barak liu, iha departamentu ida mane ida xefe, sub- xefe tenke feto ou xefe feto, mane sub- xefe laiha esplikasaun laiha deskulpa tenke nune’e, no ba sira ne’ebé ita hatete defisiénsia , xefe departamentu ba sosiedade sivíl ita-nia alin ida koñesidu iha Timor- Leste ita hotu hotu koñese nia, nia iha problema ho vizaun maibé nia laiha problema kakutak, nia kakutak di’ak liu ema lubuk ida ke matan di’ak hela, no ha’u hatete ba nia ó la’ós mai prezidénsia atu tau matan ba sira ne’ebé matan la di’ak, maibé ó tau matan ba sosiedade sivíl tomak, no ba komunidade LGBTI iha fatin mós iha ne’e sira Maromak nia oan ita-nia oan,” dehan Horta
Nia afirma tan katak, Timor –Leste sei kontinua halo diplomasia ho nasaun sira iha mundu, atu nune’e bele kria relasaun metin nafatin, no iha rai laran PR foun ne’e relata katak durante nia mandatu sei promove diálogu ho Lider Nasionál sira no parte hotu hotu atu nune’e bele dezenvolve nasaun ba oin.
“Ita-nia polítika ba oin, kontinua polítika internasionál diplomasia ne’ebé ita halo ke orienta ita dezde tempu luta kedas buka amigus laiha inimigus ita sei fó prioridade ba nasaun viziñu hanesan Indonesia, Australia, Nova Zelándia rai sira be besik ita rai Asean sira, ita buka atu tama iha Asean enkuantu la tama ita hametin relasaun bilaterál ho rai sira ne’e hotu, rai sira seluk hanesan Japaun, Korea, Xina, India ne’ebé importante ba ita iha rejiaun Azia importante mós Uniaun Europeia ita-nia relasaun di’ak ho Portugal, Prezidente ne’e mai hosi Portugal to iha ne’e ho delegasaun boot ida, ita-nia relasaun tenke dinámiku, iha mundu ne’ebé komplikadu tebetebes ita tenke hametin liu tan ita-nia relasaun diplomátiku,. Iha rai laran ha’u buka diálogu buka hako’ak hotu hotu partidu sira iha parlamentu no partidu sira ne’ebé seidauk hetan fatin iha parlamentu, ho sosiedade sivíl, ho intelektuál, akadémiku sira, ho ita-nia igreja doben liu hosi konferénsia episkopal Na’i Bispu sira, Amu sira, señora Madre sira, ha’u sei buka oinsá ita bele hametin liu tan parseria ho igreja tuir konkordata,” hateten Horta
Kona ba prioridade importante ne’ebé sei realiza, Horta esklarese katak Edukasaun, Saúde, bee mós no prioridade mós ba defeza no seguransa.
“Prioridade ba oin mak ne’e ha’u-nia hanoin Edukasaun, Saúde, Agrikultura, Seguransa alimentár, nutrisaun, bee mós, transparénsia iha estadu defeza, seguransa, dezenvolvimentu Oekuse Ambenu, Kovalima, Bobonaru, hametin relasaun ho Indonézia no partikulár ho provínsia NTT ke sira iha ita-nia sorin realidade dezenvolvimentu nivel dezenvolvimentu hanesan ita, ho apoiu makas hosi Governu sentrál Jakarta, ita bele buka hametin liu tan relasaun ho provínsia Indonézia sira besik ita ne’e, relasaun di’ak mós metin ho Estadus Unidos Amérika iha setór oin-oin, apoiu ita dadaun tinan sira ne’e nia laran sei aumenta liu tan liuhosi programa millennium chalange corporation,” Horta esplika.
Nune’e nia hateten tan katak, durante mandatu sei sai Prezidente ida aberta, jardín palásiu PR sei loke ba públiku, liuliu ba labarik sira no sei halo instalasaun ba rede internét atu nune’e joven no estudante sira bele asesu.
Discussion about this post