Padre Evaristo : Knaar Jornalista Importante Tebes, Atu Lori Nasaun Timor-Leste Hakat Ba Oin Liuhosi Haklaken Informasaun Ne’ebé Lolos Ba Públiku

Reportajen: Jacinto Amaral Soares

Padre Evaristo da Costa Soares hateten katak, nasaun Timor-Leste atu la’o ba oin, jornalista sira mós iha responsabilidade atu kontribui liuhosi sira nia obra jurnalistiku ne’ebé kualidade no informasaun ne’ebé sira divulga tenke lolos. Padre hato’o liafuan hirak ne’e iha misa ne’ebé prezide hodi selebra loron mundiál Liberdade Imprensa, ohin iha kapela Surikmas, Dili  (03/05/2022).

Iha omília Amu selebrante ne’e haklaken, jornalista sira nia servisu importante tebes iha prosesu dezenvolvimentu nasaun Timor-Leste nian, tanba ne’e tenke haknaar an ho profisionál liu tan, hodi serví nafatin públiku  liuhosi informasaun ne’ebé mak lolos.

“Ha’u hanoin ita husu Santo boot na’in rua ne’ebé ohin ita selebra S. Filipe ho S. Tiago atu tulun imi atu hala’o imi-nia knaar mais profisionál liu tan, agora dadaun ita hare diferensa, dala ruma ha’u mós ko’alia ho imi balu mai hasai informasaun wainhira ita rona fila fali ladún hanesan ho buat ne’ebé ita atu dehan, iha diferensa, ne’e tanba sá, tanba dala ruma imi ladún iha seriedade para atu bele tau imi-nia atensaun tanba buat ida ne’ebé atu fó ba públiku tenke atensaun tebes, tanba diferensa palavra ninia fraze ida ne’e, bele lori hotu ninia konteúdu ka ninia diferensas sentidu iha ne’ebá, ne’e duni tenke fó atensaun para hasae kualidade tanba imi ninia servisu ne’e importante tebes iha nasaun ida oinsá nasaun ne’e atu bele la’o ho di’ak ba oin iha mós imi hotu hotu nia liman no imi-nia responsabilidade. Hateten Padre Evaristo

Nune’e relasiona ho loron mundiál liberdade imprensa ne’ebé monu iha loron 3 fulan Maiu ne’e, Padre Evaristo husu atu jornalista sira hotu hala’o knaar ho  prinsípiu no uza liberdade ne’ebé iha ho responsabilidade la’ós liberdade sem limitasaun.

“Ho liafuan de’it imi bele transforma mundu, mais depende liafuan ne’e imi hasai pozitivu ka negativu, se liafuan ida pozitivu nia konsekuénsia ne’e nia rezultadu  pozitivu, no wanhira imi hasai liafuan ida ne’ebé mak negativu nia konsekuénsia mós negativu, tanba ne’e mak liberdade imprensa ne’e ema dehan  diatur oleh hukum no regula mós ho étika morál para ema labele liberdade ida ne’ebé sem limite liberdade ida ne’ebé mak hatene iha ninia koridor no ninia fronteira, para ema bele uza liafuan sira ne’e ho lolos no liafuan sira ne’ebé ema uza tenke ho responsabilidade tomak”,  Padre Evaristo esplika.