Orsamentu Ratifikativu La Nesesáriu, AHDMTL  Husu PR Analiza Kle’an Molok Foti Desizaun

Reportajen : Jacinto Amaral Soares

Portavós Asosiasaun Halibur Defisiensia Matan Timor-Leste (AHDMTL), Terezinha Ribeiro informa katak, hanesan sosiedade sivíl sira lamenta tebes ho orsamentu ratifikativu ne’ebé la refleta ba povu nia moris, inklui ema ho defisiénsia sira, tanba ne’e sira husu ba Prezidente Repúblika analiza kle’an molok foti desizaun, promulga ka veta. Lamentasaun hirak ne’e hato’o liu hosi konferénsia imprensa ne’ebé realiza iha edifísiu AHDMTL Manleuana, Dili, ohin (16/05/2022).

Portavós ne’e afirma katak, orsamentu ratifikativu refere la fó benefísiu ba povu, no ezekusaun orsamentu jerál estadu 2022 seidauk másimu tanba ne’e  la nesesáriu atu foti tan orsamentu ratifikativu.  

“Liu hosi biban ida ne’e ami hosi organizasaun Asosiasaun Halibur Defisiensia Matan Timor- Leste (AHDMTL), hakarak deklara ba públiku katak, ami sei la aseita ho aprovasaun orsamentu ratifikativu,

1.       Hare ba situasaun reál iha Timor-Leste ema barak sei moris iha susar no terus nia laran liuliu ema ho defisiénsia sira,

2.       Hanesan sosiedade sivíl lamenta tebes ho aprovasaun orsamentu parlamentár ratifikativu ida ne’e la fó benefísiu ba ema hotu,

3.       Ezekusaun orsamentu jerál estadu (oje) 2022 seidauk to 30 porsentu tanba ne’e la nesesáriu atu foti tan orsamentu ratifikativu,

4.     Husu ba Prezidente Repúblika atu halo ánaliza ba orsamentu ratifikativu hodi foti desizaun,”  Terezinha informa.

 Iha fatin hanesan Diretór interinu AHDMTL, Gabriel de Souza esklarese katak, orsamentu ratifikativu ne’ebé Parlamentu  Nasionál aprova ona,  la inkluzivu tanba la inklui asuntu defisiénsia.

“Ami lamenta ho orsamentu ratifikativu ne’e tanba ho razaun orsamentu ne’e rasik prátika eskluzivu la inkluzivu, tanba ita hare pontu atividades ne’ebé hosi orsamentu ratifikativu ne’e hosi númeru 1 to 13 ne’e la inklui asuntu defisiénsia iha laran sira tau fali prioridade liuliu ba sede arte marsiais ba veteranus, sim ita rekoñese veteranus mais sira hatene asuntu ne’e importante la’ós tau iha asuntu ratifikativu maibé tau iha orsamentu jerál do estadu nian, tanba ne’e mak ami organizasaun defisiénsia no  hanesan sosiedade sivíl la konkorda tebes  la nesesáriu liu atu foti tan orsamentu ratifikativu,” Gabriel esklarese.

Gabriel hatutan tan katak, relasiona ho oje 2022 ne’ebé governu ezekuta seidauk to 30 porsentu tanba ne’e sira husu ba Prezidente Repúblika atu veta orsamentu refere.

“Mai ami mak ne’e ami  sosiedade sivíl husu ba Prezidente Repúblika atu veta orsamentu ida ne’e tanba ratifikativu la nesesáriu atu promulga orsamentu ratifikativu tanba ita hare Governu nia ezekusaun ba orsamentu ida nenee foin to 22 porsentu seidauk to 30 porsentu agora mosu diskriminasaun ba orsamentu ida ne’e no ezekusaun ida ne’e seidauk másimu, tanba ne’e ami husu ba na’i Prezidente Repúblika atu veta orsamentu ratifikativu tanba sosiedade sivíl maioria la konkorda atu aprova orsamentu ratifikativu ne’e. dehan Gabriel.