Sesta Feira Santa : Jesus Cristo Nia Mate Iha Kruz Atu Kasu Ita Ema Nia Sala

Reportajen: Jacinto Soares

Iha omilia refleksaun ba sesta feira santa Padre, Bernardo Pereira Domingos Paiva hateten ba sarani sira iha Same, Jesus Cristo nia mate iha Kruz atu kasu ita ema nia sala. Padre Paiva haklaken lia hirak ne’e, iha selebrasaun Sexta-Feira Santa ne’ebé realiza iha Igreja Nosa Señora Asunsaun Same, (15/04/2022).

Amu selebrante ne’e hateten, Sexta-Feira Santa loron oportunu ba sarani mundu tomak atu halo reflesaun hodi hanoin kona-ba Jesus Cristo nia terus to’o mate iha cruz iha foho Kalváriu.

 “Ita hanoin kona-ba Jesus nia paixaun, ita hanoin kona ba Jesus nia mate, sei ita hanoin kona ba Jesus nia mate, Ita halo perguntas tanba sá mak Jesus  mate, iha resposta lubuk ida ne’ebé mai, ida tanba ita ema nia sala, ida tanba na’i maromak hadomi tebes ita, nia haruka nia oan mai mate tanba ita ema nia sala, resposta lubuk ida ita bele fó no ita bele hetan liu hosi serimónia ida ne’e, maibé pergunta fundamentál mak ida ne’e, serimónia ida ohin ita halo daudauk ne’e la buat seluk, hanorin kona ba Jesus ninia mate. Agora se ita hare didiak ninia mate ne’e mate ba se, mate ba nia família ka mate ba nia aan rasik ka mate ba sosiedade Judeia tomak ka, ou mate tanba se,  maibé nia mate atu kasu ita ema nia sala, mate atu hamos ita ema nia sala, mate atu salva ita ema iha Na’i Maromak nia futar oin, tanba ne’e liafuan sao João nian hateten, ema ida ne’ebé fó ninia aan mate tanba ema seluk ne’e nia domin boot liu, tanba ne’e Jesus Cristo nia mate iha Cruz hodi kasu ita ema nia sala ne’e, hatudu nia domin ba ita,”Padre Paiva hateten.

Nune’e Padre Paiva hatutan tan, Jesus Cristo ninia mate laiha baze fundamentál no jurídika atu kondena nia iha momentu ne’ebá, maibé tanba de’it evanjellu ne’ebé nia haklaken kona-ba Maromak nia liafuan to’o ikus ema tesi no bobar lia hodi hedi nia ba Kruz to’o mate.    

“Ohin selebrasaun ida ne’e lori ita atu hanoin kona ba Jesus nia mate, Jesus nia mate ida ne’e laiha julgamentu ida ne’ebé lolos kona-ba ninia mate, autoridade sira iha tempu ne’ebá sira halo desizaun ida halo sentensa oho Jesus Cristo nenee, laiha ninia baze fundamentál, baze jurídika ne’e laiha, tanba hanoin dehan primeiru ema hotu hotu fiar nia, ema hotu hotu rona nia, no hare katak nia halo milagre bar-barak, lori nia naran sai populár iha rai Judeia tomak, no ninia pozisaun ne’e ameasa autoridade sira iha tempu ne’ebá, entaun sira halo desizaun ida di’ak liu ita oho nia duke nia hanorin sira ne’e influénsia ema hotu hotu, entaun dalan ida, solusaun ikus ne’e mak oho nia, entaun sentensa ida ne’ebé Jesus simu iha tempu ne’ebá  ne’e laiha baze jurídika laiha baze fundamentál atu kondena nia ba mate,” Bibi atan ne’e hateten.