Reportajen: Jacinto Amaral Soares
Ministériu Asuntu Parlamentár no Komunikasaun Sosiál (MAPKOMS) ho Sekretáriu Estadu Komunikasaun Sosiál (SEKOMS) ohin ho Autoridade Nasionál Komunikasaun (ANC- sigla portugés) realiza serimónia transferénsia orsamentu tinan 2022 ba primeira faze ho montante $56, 847.75 ba Rádiu Komunidade 15, iha salaun ANC Merkadu Lama, Dili, (05/04/2022).
Rádiu komunidade 15 ne’ebé hetan apoiu fundus husi Governu Timor – Leste, liu husi MAPKOMS ho SEKOMS, mak Rádiu Komunidade Kumoro, Rádiu Komunidade Atauro, Rádiu Komunidade Liquica, Rádiu Komunidade Ermera, Rádiu Komunidade Aileu, Rádiu Komunidade Maubisse, Rádiu Komunidade Same, Rádiu Komunidade Suai, Rádiu Komunidade Maliana, Rádiu Komunidade Oecusse, Rádiu Komunidade Manatuto, Rádiu Komunidade Bucoli, Rádiu Komunidade Baucau, Rádiu Komunidade Viqueque no Rádiu Komunidade Lospalos.
Iha entrevista Xefe Gabinete SEKOMS, Osorio Almeida informa katak,“ Governu liu hosi MAPKOMS ho SEKOMS sempre aloka orsamentu ba Rádiu Komunidade sira kada tinan dala rua, nune’e tinan ida ne’e, ohin halo transferénsia ba primeira faze.
MAPKOMS ho SEKOMS hosi Diresaun Promosaun Dezenvolvimentu Média Lokál selebra kontratu transferénsia públiku ba Rádiu Komunidade sira, ohin primeira faze ho 40 porsentu ba Rádiu Komunidade 15. Iha primeira faze ne’e, sira sei hetan transferénsia,”
Osorio Almeida, haklean liu tan,“ Kada tinan Governu liu hosi SEKOMS no MAPKOMS sempre fó, Iha tinan ida ne’e fó dala rua, ne’ebé ohin ita fó primeira faze ba Rádiu Komunidade sira. Enkuantu ba média privadu sira Xefe Gabinete ne’e esklarese katak, Sira seidauk hetan subsídiu hosi Governu, tanba iha tinan 2019 dekretu lei kona-ba subsídiu ba média privadu Prezidente Repúblika la promulga.
Iha planu MAPKOMS ho SEKOMS sei esforsu hodi nune’e lei ne’e Prezidente bele promulga.
“Ba transferénsia ohin ne’e, ita só ba de’it Rádiu Komunidade sira, ne’ebé mak tinan tinan ita fó apoiu, agora ba média privadu sira, hakarak atualiza de’it katak iha tinan 2019 SEKOMS konsege duni halo dekretu lei ida kona ba subsídiu ba média privadu sira, no momentu ne’ebá ne’e Konsellu Ministru aprova no ba duni iha Prezidente Repúblika maibé veta, entaun ita labele implementa tam-ba ida ne’e mak média privadu sira.
Ita hare husi rekezitu lubuk ida oin-sá atu fó ka la fó, tam-ba konforme lei regras laiha dalan atu ita fó, entaun ita susar atu fó, tanba buat hotu-hotu tuir prosedimentu, Sua Exelénsia Sekretáriu Estadu nia esforsu, kontinua esforsu atu lei ne’e Prezidente bele promulga para ita bele implementa, maibé dezde 2020, 2021 to’o mai agora seidauk, entaun seidauk bele, semana hirak liu ba Sua Exelénsia ko’alia ona, oinsá para atu koordena hato’o fila fali ba Sua Exelénsia Ministru Asuntu Parlamentár no Komunikasaun Sosiál, esforsu fila fali esbosu ne’e para ho intensaun ne’e fó espasu, fó dalan para Governu hare mós ba asuntu ne’ebé kolega sira aprezenta ne’e, tanba Governu nia hanoin hakarak fo apoiu maibé, entermus de prosedimentu legál ita hein mak ita foin realiza,” Dehan Osorio Almeida
Discussion about this post