JRH: Sei Servisu Hamutuk Ho Guvernu, Harii Bairu Universitariu Ba Joven Sira Bainhira Eleitu Ba PR

Reportajen: Jacinto Amaral Soares

Dr. José Manuel Ramos Horta hato’o hela, nia promesa ba AHMDTL atu halo uma ba sira. Manleuana, Dili, (31/03/2022). Photo By: Jacinto Soares

Kandidatu ho númeru sorteiu 1 Dr. José Manuel Ramos Horta deklara katak sei servisu hamutuk ho governu hodi hari’i bairru universitáriu ba joven sira ne’ebé mai hosi munisípiu sira atu bele hela hodi hala’o sira nia estudu. Lia hirak ne JRH hato’o bainhira halo vizita ba Asosiasaun Halibur Difisiente Matan Timor- Leste (AHMDTL),  iha Manleuana, Dili, (31/03/2022).

Nune’e Horta akresenta tan, Bainhira povu fó fiar, sei servisu hamutuk ho Governu hodi  tau prioridade ba asuntu sira ne’e.

Premiadu Nobel da Paz ne’e hateten, Sei tau prioridade ba agrikultura, edukasaun no  saúde, maibé bainhira, eleitu ba Prezidente sei tau importánsia mós ba nesesidade joven sira nian no sei servisu hamutuk ho Governu hodi harii bairru universitáriu.

“Bom ha’u nu’udar ema, nu’udar prezidente, ha’u sei ko’alia maka’as kona-ba agrikultura, seguransa alimentár, edukasaun, saúde buat sira ne’e hotu ligadu ho seguransa alimentár, ligadu ho nutrisaun, ligadu ho apoiu ba joven estudante sira, apoiu oinsá ida-idak hare sira nia nutrisaun, estudante sira hare sira nia hela fatin kondisaun sira moris, portantu se ita hakarak juventude ne’ebé garantia futuru ba rai ne’e sira tenke iha saúde mak sira bele estuda di’ak liu tan, ne’e signifika tenke hare fatin sira hela ne’e iha ne’ebé, tam-ba barak hela sena malu iha fatin ne’ebé laiha kondisaun di’ak, laiha ijiene, kondisaun sira han hemu nian, difikuldade sira ne’e. Entaun ha’u sei hare propoin ba Governu harii bairru universitáriu para joven sira universitáriu, liuliu sira ne’ebé mai hosi foho ne’e família laiha para hela iha bairru universitáriu ne’e,” Horta hateten.

Entretantu kandidatu na’in rua ne’ebé hakat ba segundu ronda mak José Manuel Ramos Horta ho Francisco Guterres Luolo, tuir numeru sorteiu ne’ebé tribunál anúnsiu ona kandidatu Horta ho númeru sorteiu 1 no Luolo iha númeru 2.

Iha oportunidade ne’e wainhira jornalista sira husu kona ba abertura kampaña  ba kandidatu ho númeru sorteiu 1 ne’e sei hala’o iha ne’ebé, ho nune’e nia hatán katak sei hala’o uluk iha Oecusse.

“Dia 2 ha’u ho maun boot Xanana arranka ba Oecusse depois fila mai Dili, kampaña fatin ne’ebé ami na’in rua hamutuk mak Oecusse, Lospalos, Dili no sira seluk ami ba ketak ketak ne’e para bele  hela loron rua aumenta tan tempu iha fatin sira ne’e no la halo hanesan komísiu bar-barak hanesan primeira ronda konsentra liu ba mini komísiu dor to dor,” Esplika JRH.