Aviaun Qantas Ofisialmente Lansa Voo Dahuluk Hosi Governu Timor-Leste Ho Australia

Reportajen: Jacinto Amaral Soares

Governu Timor-leste liu hosi Ministru Transporte no Komunikasaun (MTK) Jose Agostinho da Silva, realiza lansamentu ofisiál voo (semo) dahuluk ba aviaun Qantaslink ho rute Dili Darwin. Serimónia lansamentu refere realiza  iha aeroportu, Prezidente Nicolao Lobato, Dili, Kuarta – Feira, (30/03/2022).

Iha serimónia refere hetan partisipasaun hosi Ministru Transporte Komunikasaun Jose Agostinho da Silva, Vice Ministru Finansas Antonio Freitas, Sekretáriu Estadu Protesaun Sivil, Joaquim Gusmão, Embaixadór Australia iha Timor-Leste, William Castello, Xefe Operasionál Qantaslink Petrea Bradford,  no marka mós prezensa hosi AACTL, ANATL, APORTIL, ANC, PNTL, Imigrasaun, Alfandega no entidades relevantes sira seluk.

Relasiona ho lansamentu voo aviaun refere, Ministru Agostinho afirma, Timor-Leste marka tan istória foun ida, tam-ba bele aumenta tan konektividade aéreo entre, Timor-Leste no Australia.

“Ha’u hanoin loron ida ohin, loron ida ke istóriku ba Timor-Leste, liuliu iha konektividade aéreo entre Timor-Leste ho Australia, nu’udar ita hotu hatene katak ne’e la’ós asuntu ida ke fásil, lori tempu ida ne’ebé ke naruk, ohin iha ha’u nia diskursu, ha’u hato’o istorikamente, ha’u hato’o iha ne’ebá, no ohin loron mak ita foin realiza ita-nia konektividade aéreo ba reguler flight, durante ne’e ita hotu hatene katak ita-nia konektividade aéreo entre Tmor-Leste Australia ne’e ita uza charter flight, mas depois de Governu Timor-Leste ho Australia asina akordu ida ba konektividade aéreo ninian no ratifika hosi Parlamentu Nasionál, nasaun rua nian, ho ida ne’e nu’udar baze ba Governu Australia, sira dezigna sira nia aviaun Qantas airlines, ohin ita halo lansamentu primeiru voo para bele asegura ita-nia konektividade aéreo entre Timor-Leste Australia no bele fasilita ita-nia pasajeirus,”Agostinho akresenta   

Membru Governu ne’e hatutan tan katak, aviaun Qantas sei halo voo dala 3 kada semana, no  iha posibilidade  sei aumenta voo iha futuru, depende ba nesesidade.

“Inisialmente ita halo voo dala tolu por semana, no ba futuru ita sei hasa’e ba dala lima por semana, mas ida ne’e depende ba ita nia demanda nesesidade, ba futuru ita asegura katak ita-nia konektividade ne’e asegura nafatin entre Timor-Leste Australia, nune’e bele fasilita ita  katak, iha serteza ba ita-nia populasaun wainhira halo viajen karik sira laiha duvida katak laiha regulár flight ou komersiál flight entre Dili Australia, ne’e aseguradu ona ho akordu servisu aéreo ne’ebé mak ita ratifika ona,” Ministru subliña.

Iha fatin hanesan xefe operasionál Qantaslink Petrea Bradford informa katak, provizoriamente kada semana ida, aviaun Qantas sei halo voo dala tolu, maibé iha fulan Jullu sei aumenta  voo  dala lima iha semana ida.

“Agora komesa halo voo semana ida dala tolu, depois fulan Jullu ita sei hare frekuénsia ba dala lima kada semana ida, entaun agora komesa ba oportunidade barak no oportunidade karik foun iha futuru ba halo servisu iha Timor-Leste, entre Timor-Leste no Australia no nasaun seluk,” Explika Petrea

Nune’e kona-ba billete xefe operasionál ne’e hateten  katak, rute Dili Darwin ho presu ba billete  totál  dolár atus- rua -tolu -nulu –resin-neen ($236)   

“Entaun agora billete presu komesa iha  $236 ba Darwin, one way ne’e ba de’it”, Hakotu Petrea.