Reportajen: Jacinto Amaral Soares
Tenente Jenerál reformadu Tito da Costa Cristovao “Lere Anan Timur” (LAT), fó parabéns ba kandidatu Prezidente Repúblika na’in rua ne’ebé hakat ba segunda volta, no nia husu ba ida ne’ebé povu fó fiar, atu mantein unidade nasionál no promove diálogu. Lia hirak ne’e hato’o bainhira realiza konferénsia imprensa iha Praia dos Kokeirus Dili, Tersa-Feira, (29/03/2022).
Lider ne’e afirma, Prezidente ne’ebé eleitu tenke iha responsabilidade ba povu no alkansa sira nia vizaun iha tinan lima ne’e ba oin, hodi konsentra ba dezenvolvimentu nasionál.
“Hau sauda kandidatu na’in rua ne’ebé ke tama ona ba segunda volta, parabéns povu fó ona nia konfiansa ba imi, ha’u-nia mensajen ba imi katak imi mós iha responsabilidade ba povu ida ne’e, hodi hala’o kampaña ida ho di’ak hodi konsentra de’it ba oinsá imi sei alkansa imi-nia vizaun iha tinan lima oin mai, ha’u husu imi atu mantein diálogu, mantein prátika polítika ne’ebé konduzivu ba unidade pás no estabilidade.”LAT akresenta
Iha biban ne’e lider nasionál ne’e apela ba sidadaun hotu-hotu atu labele fahe líder sira, tanba ne’e nia husu sidadaun hotu atu labele lansa liafuan ne’ebé la merese publika iha média sosiál
“Ha’u hare ona iha média sosiál no publikasaun barak mak relativa ho kampaña negra, kampaña meta hosi apoiantes no simpatizantes sira balu komesa ona ho liafuan rasista sira, ne’e labele, ne’e ladi’ak, ne’e kontra revolusionária ita hotu timoroan de’it, laiha mistisu no timoroan, laiha keiju no ai-fariña, laiha ain-tanan no sapatu ita hotu maubere no buibere de’it.” hateten Lere.
Nune’e kona-ba pozisaun Jenerál LAT nian atu apoiu kandidatu Francisco Guterres Luolo ho José Ramos Horta, tanente reformadu ne’e deklara katak nia seidauk iha desizaun atu apoiu entre kandidatu na’in rua ne’ebé hakat ona ba segundu volta.
“Ohin loron balun komesa kestiona, liuliu ha’u-nia apoiantes sira husi estrutura to’o baze ne’ebá, kestiona ha’u apoiu hosi kandidatu ida ne’ebé, mas ha’u-nia prinsípiu katak ha’u promove diálogu, promove unidade, estabilidade atu bele kria dezenvolvimentu iha ita-nia rai laran, ha’u hili lider ida ne’ebé ke mós, tuir ha’u-nia prinsípiu, promove diálogu, promove unidade nasionál rekonsiliasaun no estabilidade ba ita-nia rain, mas ha’u lakohi para ita kuandu ukun, ukun ho vingansa, ita kuandu ba ukun labele sai opozisaun ba ida seluk, mai-bé hotu hotu tenke servisu hamutuk atu bele lori ita-nia nasaun ne’e ba oin, tam-ba ne’e mak ha’u deklara, to’o agora ha’u seidauk iha posizaun ida atu apoiu kandidatu A ka kandidatu B, sese mak ukun ba ha’u problema laiha, mesak Timor oan mak ukun, importante mak ukun rai ida ne’e, sai líder ba rai ida ne’e, hanesan aman ba nasaun ida ne’e, nu’udar Prezidente Repúblika tenke hako’ak ema hotu, tenke hako’ak lider hotu hotu.” LAT subliña
Discussion about this post