Reportagem; Virgilio Viana
Jerasaun Patriota ka’er-metin ninia prinsipiu ne’ebe hatur iha Art. 7 husi ninia estatutu kona-ba prinsipiu apartidaria katak la fo apoiu ba kualker kandidatura ida ba iha eleisaun prezidensial nian. Dili/ Quarta-feira; 23/02/2022.
Porta voz Mamensio Freitas hateten,”Jerasaun Patriota nu’udar asosiasaun ka klibur Ida ne’ebe halibur funu na’in nia oan sira, ho ninia vizaun no misaun rasik, atu hatutan hikas prinsipiu luta-na’in sira nian hodi liberta povu husi ki’ak no Mukit no mos kontribui ba dezenvolvimentu nasaun Ida ne’e nian ba jerasaun aban-bainrua. Asosiasaun Jerasaun Patriota hari’i bazea ba artigu 43 Konstituisaun Republika ne’ebe garante direitu no liberdade sidadaun sira nian atu harii asosiasaun ruma no bazeia mos ba dekretu Lei nu. 5/2005 kona-ba pessoa koletiva la ho lukrutivos.”
“Tuir prinsipiu no natureza Jerasaun Patriota nu’udar asosiasaun ida partidaria ne’e katak, nu’udar asosiasaun jerasaun patriota “Sei la halis” ba Forsa ka kbi’it partidu politika Ida, maibe respeita nafatin istoria no liberdade ema ida-idak nian atu espresa ninia aspirasaun hodi afilia ba forsa ka organizasaun ka partidu politika ruma iha ita nia rai doben Timor-Leste.
Asosiasaun Jerasaun Patriota hakarak klarifika ba publiku ho ninia pozisaun balun katak ka’er metin ba ninia prinsipiu ne’ebe hatu’ur iha Artigu 7 husi ninia Estatutu kona-ba prinsipiu apartidaria, nu’udar jerasaun patriota la fo apoiu ba kualker kandidatu Ida.
“Alende ne’e apela mos Jerasaun patriota Sira hotu atu respeita kandidatu hotu-hotu, evitta deklarasaun insulta ruma hasoru kualker kandidatu Ida, basa sira mesak Timor oan de’it. “Keta Haluha no tau didiak iha fuan katak ita barak mak lakon no la konsege konhese ita nia inan ho aman rasik tamba de’it sira nia determinasaun hodi luta ba Rai Lulik no Naran Lulik Timor-Leste.” Katak Mamensio Freitas.
Discussion about this post