PERMA YOUTH CAMP 2021: Muda Mentalidade Joventude Sai Independensia

Formador Aqua no Pekuaria, Abilio Da Costa

Reportajen: Odete Bete

Organizasaun non govermetal PERMATIL  oferese oportunidade ba Joventude hamutuk atus hat rua nolu resin Walu  ( 428) mai husi Munisipiu 13 inklui Raeo ho tematiku  oi-oin  inklui tematiku Aqua e Pekuaria loke Juventude sira nia hanoin oin-sa hakiak animal ho maneira ne’ebe los.

Iha biban ida ne’e, Formadores Tematiku  Aqua e pekuaria  fahe matenek  ho partesipantes sira kona-ba oin – sa  halo pratika hakiak animal no oin–sa kura animal ho ai moruk tradisioanal. Atividades refere halao  Iha suku Dare, Aldeia Fatsuka. Sesta – feira  (05 – 09/10/2021).

Iha atividade ne’e formador Abilio Da Costa hateten.“ Observasaun ba partisipante sira ne’e ami orgulhu tebes tam-ba partisipante sira tama iha ne’e maske  hasoru problema ka difikuldade oi-oin mai-be sira halao atividade ho normal. Depois iha tematiku  ida idak tuir nia servisu, kuandu sira sai husi ne’e sei hetan esperiensia lubuk ida hodi aplika iha sira nia fatin ka munisipiu.

Partisipantes nain hitu nolu resin tolu (73) ne’ebe inklui iha grupu tematiku Aqua e Pekuaria, pratika oin sa halo hahan no aimoruk tradisional ba animal.  

“Iha ekipa tematiko Aqua e pekuaria ne’e mos iha partisipante hitu nolu resin tolu (73) sira ne’e atu  aprende saida mak ami hanorin iha loron haat (4) nia laran no sira iha ne’e mos aprende Teoria no pratika hanesan halo hahan ba animal fahi no manu . No mos aprende kona -ba maneira Chiken traktor ho maneira integrado. Depois halo mos ai moruk tradisional ba animal, atu nune’e bele fo tulun ba ita nia komunidade sira ne’ebe la iha kbi’it atu sosa ai moruk iha loza. Entaun ho ida ne’e ita iha ona aimoruk tradisional rasik hodi tulun sira.

Iha tematiku ne’e mos iha agrikultor hotu hotu hatene hakiak animal, mai-be espesifiku ami nian ne’ebe atu fo mak hanesan: Oin-sa halo pelet, oinsa halo permentasaun hahan ba manu,  oinsa atu halo permentasaun hahan ba fahi, no mos permentasaun Ai moruk tradisional .Topiku ne’ebe espesifiku no inportante tebes ba partisipante sira.

Durante ami halao atividade ne’e iha loron haat (4) nia laran. No loron dahuluk  hamutuk ho partisipante sira halo observasaun kona-ba sasan ka fatin ne’ebe atu halo pratika, tuir mai loron daruak,  ami ho partisipante sira koalia ka halo teoria,depois loron datoluk no dahat halao pratika.” Dehan Abilio

Partisipante Aqua e Pekuaria,  Bernardo Bricho Soares

Programa Perma youth camp 2021 fo vantajem ba juventude sira ne’ebe mai husi 13 munisipiu no eduka joventude sira sei  la depende ba governu iha futuru mai.

Katak Bernardo Bricho Soares.“ Hau nia observasaun durante semana ida ne’e, ba  iha progarama Perma youth camp 2021 nian,  kapaas tebes tam-ba fo vantagen ba juventude sira kada munisipiu atu mai tuir formasaun iha area relevantes hanesan konservasaun bee, Aqua e pekuaria, horticultura, Agrofloresta, ecoToylet.

Programa permatil nian fo ba ita ne’e bele ajuda joventude sira katak la bele depende deit,  ida ne’ebe mak husi Governu nian,  mai-be ita mos iha inisiativa atu Kria rasik kampu de trabalho ba ita nia a’an ka iha ita nia grupo rasik, Iha suko, posto, to’o Ba Munisipiu. Ne’ebe hau hanoin programa hirak ne’ebe mensiona iha ne’eba ne’e.

Ita mos hetan informasaun hanesan ne’e,  bele inplementa ba Juventude sira, tam-ba sira barak mak seidauk hetan oportunidade formasaun hirak ne’e, entaun husi ita ne’ebe mak hetan ona informasaun bele habelar tan . Atu nune’e sira bele banati tuir, ita mos persiza halo plano ne’ebe diak  atu organiza grupo nune’e bele sai diak liu tan iha futuro.”

Bernardo Bricho Soares, mos iha planu hakarak tebes fahe tutan matenek ne’ebe nia hetan  husi PERMATIL sei habelar liu tan ba komunidade no joventude seluk ne’ebe seidauk hetan oportunidade ida ne’e.

“Iha programa ne’e,  hau hili tematiko Aqua e pekuaria. Formasaun ne’ebe PERMATIL sira fo previleziu tebes, maske ita iha ona pasado hatene klean kona-ba pekuaria nian. Iha ne’e koalia kona ba animal tanto manu, fahi, karau, bibi konteudu animal sira ne’e tama hotu iha pekuaria. Iha ne’e formasaun ne’ebe ami hetan maske iha animal ne’ebe ita la preve, tam-ba ne’e ami hare’e husi programa permatil buat barak mak ami aprende, hanesan oin-sa atu produs manu lokal, oin-sa atu produs Ai moruk tradisional, oin-sa atu produs pelet nst.

No ita la depende liu ba loja nian tan iha ne’e oin-sa ita bele halo kandang (Luhan) ba animal sira hanesan luhan  portal,  kandang (luhan) pungung,  luhan  batri. Iha buat hirak ami aprende iha ne’eba mos kona-ba fermentasaun animal nian hanesan fahi, manu, ida ne’e mak ami hetan durante halao formasaun ne’e. No liu husi programa ne’e fanun tebes hau atu haklean lolos no hau sei implementa iha hau nia fatin.

No plano ne’ebe mak hau atu halo ba munisipiu mak hanesan formasaun ida ne’e,  hau sei ba habelar iha komunidade no hau nain rasik mak kria uluk iha ne’eba atu nune’e bele atrai ita nia juventude sira.Tam-ba bainhira ita la halo asaun ruma sira mos la iha vontade atu halo Buat hirak ne’e.” Katak Bernardo.

 Partisipante Feto Aqua e Pekuaria,  Juanita de Jesus Pereira

Iha fatin hanesan reprezentante  partisipante feto Juanita De jesus pereira  senti kontenti ho treinamentu ne’ebe hetan husi youth Camp  tam-ba  hakbi’it liu tan nia koinesementu hodi halo tratamentu ba manu lokal ne’ebe nia iha durante ne’e.

Katak Juanita de Jesus pereira.“ Iha fatin akampamentu ida ne’e hau senti kontenti tam-ba bele hetan no koinese belun sira husi 13 distritu, no mos bele share ba malu ho espirensia ne’ebe mak diferente liu liu iha area Pekuaria nian.

Iha programa ne’e hau hili tematiku Aqua e Pekuaria, aprende  kona-ba hakiak manu no oin-sa atu atendementu ba animal ho diak,  liu liu ba manu lokal ne’ebe mak hau aprende iha loron hirak liu ba,  no hau aprende mos kona-ba ai moruk tradisional  sira ne’ebe mak bele halo prevensaun ba manu lokal ne’ebe mak hetan moras.

Juanita de Jesus Pereira durante ne’e hakiak ona manu lokal maibe sei fraku iha jestaun manajementu atendementu ba manu. Depois de treinamentu fila ba nia sei halo diak liu.

“Plano ne’ebe hau iha, atu inplementa fali iha hau nia munisipiu mak, hau fila ba,  sei hadiah jestaun manajementu ho diak liu tan, Tam-ba iha ne’eba,  hau hakiak ona manu lokal mai-be, hau nia jestaun manejamentu mak seidauk diak, entaun liu husi treinamentu ida ne’e,  hau fila sei halo diak liu tan, iha hau nia atividade ne’ebe hau halo ona,  jestaun ne’ebe diak atu nune’e  bele fo rezultado diak liu tan mai hau.

Difikuldade ne’ebe mak hau hasoru iha ne’eba,  la iha koinesemntu halo tratamentu ba manu ne’ebe hau hakiak hetan moras, mate derepenti babain hau uza fali ai moruk quimiku entaun hamate fali manu sira. Maibe agora hau aprende ona husi akampamentu ida ne’e,  iha areia Pekuario nian uza fali ai moruk tradisional ka lokal sira ne’ebe ita nian iha rasik atu nune’e bele prevene fila fali animal ne’ebe mak hau hakiak.“