By: Cris Belo
Komunikadu Imprensa ne,e Radio Rakambia asesu husi media Ministeriu Negosius Estranjeiru no koperasaun (MNEK) Iha 21 juñu 2021.
Ministériu Negósius Estranjeirus no Kooperasaun-Repúblika Demokrátika Timor-Leste esklarese ninia pozisaun kona-ba aprovasaun ba Rezolusaun Asembleia Jerál Nasoins Unidas liga ho situasaun iha Míanmar, adotadu iha 18 juñu 2021.
Ministériu Negósius Estranjeirus no Kooperasaun-Repúblika Demokrátika Timor-Leste onra hodi esklarese katak, hanesan país demokrátika ida, Repúblika Demokrátika Timor-Leste la apoia deklarasaun estadu emerjensia hosi Forsas Armadas Míanmar iha loron 1 fevereiru 2021 no asaun sira tuirmai relasiona ho governu sivíl eleitu.
Pozisaun ne’e reflete ona iha deklarasaun Timor-Leste iha 12 marsu 2021, durante Sesaun Konsellu Direitus Úmanus ba dala-46, iha ne’ebé Timor-Leste espresa ona ninia preokupasaun kona-ba situasaun direitus umanus iha Míanmar no husu atu liberta arbitráriu detidus, inklui mós prezus politikus. Alende ne’e, espresa mós apoiu tranzisaun demokrátika Míanmar no mós apela ba parte hotuhotu atu mantein diálogu no rezolve diferensias sira ho meius pasífiku.
Ministériu Negósius Estranjeirus no Kooperasaun-Repúblika Demokrátika Timor-Leste ho onra liután hodi informa katak Timor-Leste fó ninia votu abstain ba rezolusaun refere tamba laiha pozisaun komún ho nasaun membru ASEAN sira, ne’ebé iha papél fundamentál oinsa rezolve situasaun iha Míanmar.
Ministériu Negósius Estranjeirus no Kooperasaun-Repúblika Demokrátika Timor-Leste dezeja hodi reafirma kompromisu firme Timor-Leste nian ba protesaun no promove direitus umanus no, reitera Timor-Leste nia apoiu ba solusaun páz ne’ebé fasilita hosi ASEAN ba interese povu Míanmar no ba vidamoris povu nían.
Discussion about this post